នៅថ្ងៃទី២៨ ខែឧសភា ឆ្នាំ២០២៥ ឯកឧត្តម Jacques PELLET ឯកអគ្គរដ្ឋទូតបារាំងប្រចាំកម្ពុជា និងសហការី បានអញ្ជើញមកទស្សនកិច្ចនៅស្ថានីយពិសោធន៍ នៃវិទ្យាស្ថានស្រាវជ្រាវកៅស៊ូកម្ពុជាស្ថិតនៅស្រុកត្បូងឃ្មុំ ខេត្តត្បូងឃ្មុំ។

 

ជាកិច្ចស្វាគមន៍ លោក លិម ខាន់ទីវ៉ា នាយកវិទ្យាស្ថានស្រាវជ្រាវកៅស៊ូកម្ពុជា បានបង្ហាញពីប្រវត្តិ បេសកកម្ម កម្មវិធីស្រាវជ្រាវ ការបណ្តុះបណ្តាល កិច្ចសហប្រតិបត្តិការ និងសមិទ្ធផលសំខាន់ៗដែលវិទ្យាស្ថានសម្រេចបាន។ លោកនាយកបន្តថា វិទ្យាស្ថានមានតួនាទីក្នុងការដឹកនាំ និងសម្រេចរាល់សកម្មភាពស្រាវជ្រាវ និងពិសោធន៍ សំដៅជម្រុងការអភិវឌ្ឍ លើគ្រប់ផ្នែក នៃដំណាំកៅស៊ូ ចូលរួមក្នុងការជំរុញផ្នែកបច្ចេកទេសសុវឌ្ឍកម្ម នៃគុណភាពកៅស៊ូ និងតម្លៃផលិតកម្មកៅស៊ូ។ ជាមួយគ្នានេះដែរ វិទ្យាស្ថានមានតួនាទីទ្រទ្រង់ដល់ការអនុវត្តរាល់កម្មវិធីអភិវឌ្ឍន៍ដំណាំកៅស៊ូ ការធ្វើវិញ្ញាបនកម្មច្បារពូជ ការចាត់ចែងផ្តល់ពូជល្អៗ តាមការបញ្ជូល សាកល្បង បង្កើត បង្កើន និងត្រួតពិនិត្យគុណកៅស៊ូ ចេញវិញ្ញាបនបត្របញ្ជាក់ ស្របតាមលិខិតបទដ្ឋានគតិយុត្តជាធរមានផងដែរ។

 

លោកបណ្ឌិត Eric Gohet អ្នកស្រាវជ្រាវជាន់ខ្ពស់នៃមជ្ឈមណ្ឌលស្រាវជ្រាវកសិកម្មបារាំងសម្រាប់ការអភិវឌ្ឍអន្តរជាតិ (CIRAD) ប្រចាំវិទ្យាស្ថានស្រាវជ្រាវកៅស៊ូកម្ពុជា បានបង្ហាញអំពីគម្រោង FORSEA (ការព្យាករណ៍ផលប៉ះពាល់នៃការប្រែប្រួលអាកាសធាតុ និងលទ្ធភាពទទួលបានកម្លាំងពលកម្មលើខ្សែច្រវាក់ផលិតកម្មកៅស៊ូធម្មជាតិនៅតំបន់អាស៊ីអាគ្នេយ៍)។ បន្ទាប់ពីបានស្តាប់នូវបទបង្ហាញទាំងពីរខាងលើនេះរួចមក គណៈប្រតិភូនៃអគ្គរដ្ឋទូតបារាំងបានធ្វើទស្សកិច្ចនៅមន្ទីរពិសោធន៍ជាតិយថាប្រភេទ មន្ទីរពិសោធន៍សរីរសាស្រ្តទឹកជ័រ ច្បារពូជនៃក្លូនកៅស៊ូកម្ពុជា(CRRI 12 & CRRI 19) ចម្ការពិសោធន៍ក្លូនទ្រង់ទ្រាយតូច និងចម្ការពិសោធន៍ដំណាំកៅស៊ូជាមួយឈើព្រៃ។