ដំណើរទស្សនកិច្ចសិក្សារបស់សាស្រ្តាចារ្យ និងនិស្សិតនៃកម្មវិធីរដូវក្តៅ (Summer School 2025)
នៅថ្ងៃទី២២ ខែឧសភា ឆ្នាំ២០២៥ វិទ្យាស្ថានស្រាវជ្រាវកៅស៊ូកម្ពុជា បានរៀបចំទទួលដំណើរទស្សនកិច្ចសិក្សារបស់សាស្រ្តាចារ្យ និងនិស្សិតនៃកម្មវិធីរដូវក្តៅ (Summer School 2025) ក្រោមប្រធានបទស្តីពី “ចលករនៃបម្រែបម្រួលនៅក្នុងចម្ការកៅស៊ូ“ មកកាន់ស្ថានីយពិសោធន៍ នៃវិទ្យាស្ថានស្រាវជ្រាវកៅស៊ូកម្ពុជា ស្ថិតនៅស្រុកត្បូងឃ្មុំ ខេត្តត្បូងឃ្មុំ ដែលមាននិស្សិត និងសាស្ត្រាចារ្យមកពី០៤ប្រទេស ដូចជា ថៃ ឥណ្ឌូនេស៊ី ម៉ាឡេស៊ី និងវៀតណាម សរុបចំនួន ៣៨នាក់ (ស្រី១៥នាក់)។
កម្មវិធីសិក្សារដូវក្តៅឆ្នាំ២០២៥ នេះ មានការចូលរួមនិងកិច្ចសហការណ៍ជាមួយសាកលវិទ្យាល័យភូមិន្ទកសិកម្ម សាកលវិទ្យាល័យ Prince of Songkla នៃប្រទេសថៃ និងមជ្ឈមណ្ឌលស្រាវជ្រាវកសិកម្មបារាំងសម្រាប់ការអភិវឌ្ឍអន្តរជាតិ (CIRAD) នឹងទទួលបានការគាំទ្រពីគម្រោង FORSEA និងគម្រោង TALENT។
ជាកិច្ចចាប់ផ្តើមនៃដំណើរទស្សនកិច្ច លោក ផេន ភារុន នាយករងវិទ្យាស្ថាន បានបង្ហាញពីប្រវត្តិ បេសកកម្ម កម្មវិធីស្រាវជ្រាវ ការបណ្តុះបណ្តាល និងសមិទ្ធផលសំខាន់ៗដែលវិទ្យាស្ថានសម្រេចបាន។ បន្ទាប់មកលោកបណ្ឌិត Eric Gohet អ្នកស្រាវជ្រាវជាន់ខ្ពស់នៃ CIRAD បានបង្ហាញអំពី “ប្រព័ន្ធចៀរជ័រ៖ និយមន័យ និងបទដ្ឋាននៃការវាយតម្លៃគុណភាពចៀរជ័រ” ហើយជាចុងក្រោយសាស្រ្តាចារ្យ និងនិស្សិតទាំងអស់បានចុះទៅអនុវត្តផ្ទាល់ក្នុងការត្រួតពិនិត្យគុណភាពចៀរជ័រនៅក្នុងចម្ការកៅស៊ូដោយបានបែងចែកជា៥ក្រុមដើម្បីពិភាក្សា៕
